Cysylltu â gwasanaethau'r Gyfadran Busnes a'r Gwyddorau Ffisegol o bell

Tags: Faq

Rhagarweiniad
Cydamseru eich cyfrinair
Cysylltu â Rhwydwaith Preifat Rhithwir (VPN) Aber
Cysylltu â’r gwasanaeth addysgu o bell
Cysylltu â’r storfa ffeiliau ganolog

Rhagarweiniad

Gofynnwyd imi lunio’r ddogfen hon fel cyflwyniad “Sut i” syml ar gyfer cysylltu â’r gwasanaethau addysgu sy’n cael eu darparu gan y Brifysgol a’r Gyfadran Busnes a’r Gwyddorau Ffisegol.

Mae llawer o’r wybodaeth yn y ddogfen hon ar gael hefyd trwy dudalennau Cwestiynau Cyffredin y Gwasanaethau Gwybodaeth (GG). Ond, mae’r wybodaeth yn y Cwestiynau Cyffredin ychydig yn dameidiog a gall fod yn eithaf anodd i’w rhoi at ei gilydd. Lle bo’n berthnasol, byddaf yn cynnwys dolenni fydd yn eich cysylltu â’r wybodaeth sy’n cael ei darparu gan y GG.

Mae’r ddogfen hon hefyd yn trafod y gwasanaethau cyfrifiadura sy’n cael eu darparu yn uniongyrchol gan y Gyfadran Busnes a’r Gwyddorau Ffisegol ac na thrafodir o gwbl felly gan Gwestiynau Cyffredin y GG.

– Alun Jones, auj@aber.ac.uk, Medi 2020.

Cydamseru eich cyfrinair

Pan fydd y GG yn anfon manylion eich cyfrif atom, dim ond ar ôl ichi newid/gosod eich cyfrinair y maen nhw’n gallu anfon data cyfrinair Windows. Os byddwch, am ba bynnag reswm, yn gymwys ar gyfer cyfrif ar ein systemau ar ôl ichi actifadu eich cyfrif gyda’r GG, ni fydd y data a anfonir ganddynt yn cynnwys eich cyfrinair Windows ac ni fyddwch yn gallu mewngofnodi i’n peiriannau bwrdd gwaith Windows, yn lleol na thrwy’r gwasanaeth o bell.

Mae’n syniad da iawn, felly i droi at dudalen Cydamseru eich Cyfrinair y GG cyn ichi geisio defnyddio ein peiriannau bwrdd gwaith.

Unwaith yn unig fydd yn rhaid ichi wneud hyn – bydd unrhyw newidiadau eraill i’ch cyfrinair yn gweithio’n iawn.
Mae’n ddiogel i bawb ei ddefnyddio, pa un ai yw eich cyfrinair wedi’i gydamseru ai peidio, felly byddwn yn argymell i bob myfyriwr newydd fynd ati.
Mae’n cymryd tua 15 munud cyn i’r GG anfon y data atom, felly rwy’n argymell eich bod yn gwneud hyn ymhell cyn eich dosbarth ymarferol cyntaf yn un o’n hystafelloedd.

Cysylltu â Rhwydwaith Preifat Rhithwir (VPN) Aber

Mae gan Brifysgol Aberystwyth fur gwarchod sy’n diogelu’r rhan fwyaf o’r rhwydwaith mewnol rhag cael ei hacio o’r tu allan. Er mwyn cael mynediad at lawer o wasanaethau mewnol o’r tu allan i’r campws, rhaid ichi gysylltu â gwasanaeth Rhwydwaith Preifat Rhithwir (VPN) Aber yn gyntaf. Ar ôl ichi gael eich cysylltu â’r VPN, bydd eich cyfrifiadur yn gweithio fel be bai wedi ei gysylltu’n uniongyrchol â rhwydwaith Aber, a bydd holl draffig eich cyfrifiadur yn cael ei sianelu i Aber. Mae’n werth nodi nawr mai dim ond pan fydd angen defnyddio rhwydwaith mewnol Aber y dylech chi ddefnyddio’r VPN - fel arall byddwch chi’n sianelu pob dim rydych yn ei wneud i mewn ac allan o Aber, sy’n debygol o effeithio ar eich profiad o wylio Netflix!

D.S. Dim ond wrth gysylltu o’r tu allan i rwydwaith Aber y mae’n rhaid defnyddio’r VPN. Os ydych yn cysylltu o’r neuaddau neu drwy gysylltiad diwifr eduroam, nid oes raid ichi ddefnyddio’r VPN ar gyfer cysylltu.

Gosod awdurdodiad aml-ffactor

Mae tudalen perthnasol Cwestiynau Cyffredin y GG ar gyfer y cam hwn ar gael yma.

Bydd angen awdurdodiad aml-ffactor ar gyfer VPN Aber. Wrth ichi gysylltu, gofynnir ichi roi eich enw defnyddiwr a chyfrinair Aber, ynghyd â chod mynediad “pad untro” (OTP) chwe digid. Mae eich cod OTP yn newid bob 30 eiliad a bydd yn rhaid ichi osod rhaglen yn rhywle i ddweud wrthych beth yw’r cod presennol.

Mae’n bosib y byddwch wedi gwneud hyn eisoes ar gyfer Office365 ryw dro, ond mae’r VPN yn defnyddio cod OTP gwahanol. Nid yw’r rhifau a gynhyrchir ar gyfer y naill yn gydnaws â’r llall.

Rhaid gosod Awdurdodiad Aml-ffactor o beiriant ar rwydwaith y campws. Ni ellir ei wneud o’ch cartref. Ond, bydd angen ichi fedru rhedeg y rhaglen gartref er mwyn cynhyrchu codau OTP wrth gysylltu â’r VPN. Oherwydd hynny, os oes gennych ffôn/llechen Android neu Apple, byddwn yn argymell yn gryf eich bod yn defnyddio ap Symudol yn hytrach na meddalwedd bwrdd gwaith. Dyma’r manylion:

Apiau OTP a argymhellir

Ar y ffôn/llechen
Defnyddiwch un ai Google Authenticator (Android) (iPhone) neu Microsoft Authenticator (Android) (iPhone).
Windows
Mae’r GG yn argymell defnyddio WinAuth WinAuth. Lawrlwythwch y ffeil sip, cliciwch arni ddwywaith i’w hagor a llusgo’r rhaglen i’ch bwrdd gwaith.
Linux
Mae’r GG yn argymell defnyddio OTPClient. Fe ddewch o hyd iddo yn y storfeydd meddalwedd safonol ar systemau dosbarthu mwyaf cyffredin Linux a byddwn yn awgrymu eich bod yn defnyddio eich rheolwr pecynnau arferol i ddod o hyd iddo a’i osod yn hytrach na’i osod o’i darddle.
macOS
Er bod y GG yn argymell defnyddio Authy ar macOS, mae’n rhaid ichi ddatgelu eich rhif ffôn symudol a’ch cyfeiriad e-bost er mwyn ei osod. Mae’n eithaf cymhleth hefyd i fewnforio tocynnau i’r rhaglen hon. Os dymunwch ddefnyddio Authy, defnyddiwch Gwestiynau Cyffredin GG.

Byddai’n well defnyddio “Step Two” yn y storfa Apiau. Nid yw’n gofyn am fanylion personol a gallwch sganio cod QR y GG yn uniongyrchol. Byddwn yn argymell eich bod yn defnyddio’r cam hwn.

Cynhyrchu a Gosod eich Tocyn OTP

Ar ôl ichi osod un o’r rhaglenni uchod, bydd angen ichi osod Awdurdodiad Aml-ffactor ar eich cyfrif Aber a mewnforio eich “Tocyn” i’ch ap OTP dewisiedig. Rhaid gwneud hyn o rwydwaith Aber (eduroam neu gysylltiad gwifrog ar y campws)

Ewch i https://mfa.aber.ac.uk/
Mewngofnodwch trwy ddefnyddio eich enw defnyddiwr/cyfrinair Aber
Cliciwch ar “Enroll Token”
Ar y tudalen nesaf, rhowch “VPN” (neu beth bynnag a ddymunwch) yn y blwch “Disgrifiad” a chlicio ar y botwm “Enroll Token” oddi tano. Bydd cod QR yn ymddangos ar y tudalen nesaf.

Bydd yr hyn a wnewch nesaf yn dibynnu ar y rhaglen a osodwyd uchod.

Google Authenticator (Dyfeisiau symudol)
Agorwch yr ap ar eich ffôn. Os nad ydych wedi ei redeg o’r blaen, mae’n bosib y gofynnir ambell gwestiwn rhagarweiniol i chi. Gallwch anwybyddu’r rhain. Pan fyddwch yn cyrraedd y tudalen “Add an account”, cliciwch ar “Scan a barcode”. Mae’n bosib y gofynnir ichi ganiatáu i’r ap dynnu lluniau. Cliciwch ar “Allow”. Pwyntiwch gamera eich ffôn at y cod QR ar y sgrîn tan fydd yr ap wedi llwyddo i’w ddarllen. Yna, bydd Google Authenticator yn dechrau dangos codau OTP chwe digid i chi.

Microsoft Authenticator (Dyfeisiau symudol)
Agorwch yr ap ar eich ffôn. Os nad ydych wedi ei redeg o’r blaen, mae’n bosib y gofynnir ambell gwestiwn rhagarweiniol i chi. Gallwch anwybyddu’r rhain. Pan fyddwch yn cyrraedd y tudalen “Accounts”, cliciwch ar “Add Account”. Yna, cliciwch ar “Other account”. Mae’n bosib y gofynnir ichi ganiatáu i’r ap dynnu lluniau. Cliciwch ar “Allow”. Pwyntiwch gamera eich ffôn at y cod QR ar y sgrîn tan fydd yr ap wedi llwyddo i’w ddarllen. Yna, bydd Microsoft Authenticator yn dechrau dangos codau OTP chwe digid i chi.

WinAuth (Windows)
Cliciwch fotwm de’r llygoden ar y cod QR a dewis “Copy Image Location” neu “Copy image address”.

Agorwch y rhaglen WinAuth (y gwnaethoch ei gadw ar eich bwrdd gwaith yn gynharach) a chlicio ar “Add”, yna dewiswch “Authenticator” o’r gwymplen.

Cliciwch fotwm de’r llygoden ar y blwch testun nesaf at y botwm “Decode” a dewis “paste”.

Rhowch ddisgrifiad ystyrlon (e.e. VPN Aber) yn y blwch “Name”. Yna, cliciwch ar “Verify Authenticator”. Dylai’r ap ddangos cod chwe digid. Cliciwch ar “OK”. Os cewch wall sy’n cyfeirio at WinAuth yn methu dadgodio’r URL, cliciwch ar “Regenerate QR Code” a cheisiwch gopïo/gludo’r llun newydd.

Ar ôl saib byr, bydd WinAuth yn rhoi’r dewis ichi ddiogelu’r cod. Eich dewis chi yw a ydych yn ei ddiogelu â chyfrinair ai peidio. Os nad ydych yn teimlo bod angen gwneud hynny, dad-diciwch y blwch “Protect with my own password” a cliciwch ar “OK”. Bydd WinAuth yn dangos eich cod OTP cyfredol mewn ffenestr fach.

OTPClient (Linux)

Agorwch OTPClient. Os nad ydych wedi ei ddefnyddio o’r blaen, bydd yn gofyn ichi greu bas-data sydd wedi’i ddiogelu â chyfrinair er mwyn cadw eich data. Dilynwch y cyfarwyddiadau tan ichi gyrraedd prif sgrîn OTPClient.

Cliciwch fotwm de’r llygoden ar y cod QR yn eich porwr gwe a dewiswch “Copy Image”.

Nawr, ewch yn ôl i OTPClient a chlicio ar y botwm “+” i ychwanegu cod. Dewiswch “Using a QR Code”, yna “From Clipboard”.

A bwrw bod pob dim yn iawn, dylai eitem “TOTP” ymddangos yn y brif ffenestr ac, wrth ichi glicio arno, fe ddylai cod chwe digid ymddangos.

Bydd y cod hefyd yn cael ei roi ar y clipfwrdd ac yn dangos amserydd fydd yn eich rhybuddio am ba hyd fydd y cod yn ddilys.

“Step Two” (macOS)
Agorwch “Step Two” a chliciwch ar yr eicon “+” i ychwanegu cyfrif. Dewiswch “Scan Two-Step QR Code” o’r ddewislen.

Bydd ffenestr o’r enw “QR Code Scanner” yn agor.

Ewch yn ôl i’ch porwr gwe a llusgo’r cod QR ohono i’r ffenestr “QR Code Scanner”.

Cliciwch ar “Continue” a dylai eich tocyn Awdurdodiad Aml-ffactor (a elwir “PAU”) gael ei ychwanegu at brif ffenestr “Step Two”, ynghyd â’r cod chwe digid cyfredol.

Bob tro y byddwch yn agor Step Two yn y dyfodol, bydd yn dangos eich cod OTP cyfredol.

Cysylltu â’r VPN o Windows

Mae tudalen perthnasol Cwestiynau Cyffredin y GG yma.

Er y gallwch osod y feddalwedd tra mae eich cyfrifiadur personol ar y campws, ni allwch ddefnyddio’r VPN oddi mewn i rwydwaith Aber (rhwydwaith diwifr eduroam neu’r rhwydwaith gwifrog) ac, os byddwch yn ceisio gwneud hynny, bydd gwallau cysylltu yn ymddangos. Os oes gennych ffôn sy’n gallu cysylltu trwy “boethfannau”, gallech gysylltu eich cyfrifiadur â hwnnw er mwyn gwneud prawf trwy’r rhwydwaith symudol, ond af i ddim i fanylu - eich gwaith chi fydd dysgu sut i wneud hynny!

Mae’r feddalwedd yn rhwydd iawn i’w gosod. Gallwch ei lawrlwytho a’i rhedeg o’r fan yma. Cliciwch “Ie/Yes” neu “Nesaf/Next” bob tro y gofynnir i chi wneud hynny, a “Cau/Close” pan ddywedir bod y feddalwedd wedi’i gosod.

Dylech allu gweld eicon crwn, llwyd, bach yn ardal eich cilfach:

Cliciwch arno. Y tro cyntaf y byddwch yn gwneud hyn, gofynnir am eich “cyfeiriad porth/portal address”. Teipiwch pa-vpn.aber.ac.uk a chlicio ar “Connect”. Os bydd gwall yn ymddangos, cadarnhewch eich bod wedi eich cysylltu â rhwydwaith diwifr/gwifrog/4G sy’n gweithio. Dylech nodi eto na fydd hyn yn gweithio o rwydwaith eduroam Aber.

Gofynnir ichi wedyn am eich enw defnyddiwr a’ch cyfrinair. Eich enw defnyddiwr a chyfrinair Aber fydd y rhain. Ni ddylech gynnwys “@aber.ac.uk.uk” yn yr enw defnyddiwr (e.e. defnyddiwch auj yn hytrach nag auj@aber.ac.uk).

Bydd yr anogwr nesaf yn gofyn am eich cod OTP. Dyma’r rhif chwe digid o feddalwedd yr ap Authenticator y gwnaethoch ei lawrlwytho yn gynharach. Cychwynnwch yr ap y gwnaethoch ei ddewis a rhoi’r rhif y mae’n ei ddangos. Mae’r rhif yn ddilys am 30 eiliad, mewn enw, ond fe gewch ychydig o ras, felly peidiwch â phoeni os byddwch yn cymryd ychydig mwy o amser.

Ar ôl ichi roi’r cod, dylai’r VPN gysylltu a dylai’r eicon llwyd yn y gilfach droi’n las a gwyrdd, a byddwch yn sylweddoli, bryd hynny, mai eicon o’r Ddaear ydyw!

Cysylltu â’r VPN o Linux

Mae tudalen perthnasol Cwestiynau Cyffredin y GG yma.

Mae llawer o bobl wedi cael trafferth â’r pecyn VPN GlobalProtect “swyddogol” ar gyfer Linux. Mae’n golygu ffeiliau “proffil” bash byd-eang eich system ac, mewn o leiaf un achos a welais, mae’r newidiadau hyn wedi rhwystro rhywun yn llwyr rhag mewngofnodi i’r gliniadur. Rwyf wedi ceisio ei osod ar fy nghyfrifiadur er mwyn dogfennu’r broses, ond ni lwyddais i sefydlu cysylltiad oedd yn gweithio. Yn fy achos i, roedd yn eistedd mewn cylch ac yn gofyn, dro ar ôl tro, am fy enw defnyddiwr a fy nghyfrinair.

Os dymunwch ei ddefnyddio, ewch i’r tudalen GG uchod. Ond nid wyf yn ei argymell ar Linux ar hyn o bryd.

Mae prosiect ffynhonnell agored, OpenConnect, yn gweithio’n dda wrth gysylltu â gwasanaeth VPN Aber. Rwy’n ei ddefnyddio ers 6 mis heb broblemau ac nid yw’r bobl rwyf wedi eu cyfeirio ato wedi dod yn ôl ataf i adrodd ynghylch unrhyw broblemau ychwaith.

Mae OpenConnect ar gael yn storfeydd rhagosodedig gwahanol systemau dosbarthu, ond cofiwch fod angen fersiwn 8.0 neu’n uwch arnoch i fod yn addas ar gyfer GlobalProtect. Mae gan Ubuntu a Mint 20.x hyn yn eu storfeydd meddalwedd rhagosodedig. Ar gyfer fersiynau hŷn o Mint ac Ubuntu, rwyf wedi crynhoi’r fersiwn sy’n cynnwys darnau diweddaraf Debian, ac mae’n ymddangos fel pe bai hynny’n gweithio. Felly…

Os yw eich storfa yn cynnwys OpenConnect 8.0.0 neu’n uwch, gallwch ei osod a’i ddefnyddio.

Os ydych yn defnyddio Mint 19.x, gosodwch OpenConnect o’r storfa safonol (er mwyn cael y dibyniaethau) cyn lawrlwytho libopenconnect5 ac openconnect. Wedyn, agorwch derfynell a’u gosod. Gan dybio eich bod wedi’u lawrlwytho i’ch ffolder Lawrlwythiadau, gallwch wneud hyn:

cd ~/Downloads
sudo dpkg --install libopenconnect5_8.02-1+deb10u1_amd64.deb openconnect_8.02-1+deb10u1_amd64.deb

Ategyn NetworkManager

Nid yw cymorth GlobalProtect wedi’i integreiddio i ategyn NetworkManager fersiynau o Mint/Ubuntu sy’n hŷn na 19.x.

Ar Mint/Ubuntu 20.x, mae’r ategyn yn bod (networkmanager-openconnect-gnome) ond, oherwydd nam sy’n bod ers tro nid yw’n gosod y llwybr rhagosodedig trwy’r VPN yn gywir. Er eich bod chi’n gallu cysylltu â’r VPN trwy’r rhyngwyneb defnyddiwr graffigol (GUI) cyfeillgar, nid yw’n gweithio!

Er bod gwahanol ffyrdd o fynd ati i drwsio hyn, rwy’n argymell defnyddio’r offer llinell orchymyn isod.

Defnyddio’r llinell orchymyn

Gartref, rwy’n agor terfynell ac yn defnyddio’r llinell orchymyn isod i gysylltu â VPN Aber:

sudo openconnect --user=auj --protocol=gp pa-vpn.aber.ac.uk

Wrth gwrs, mi ddylech chi newid --user=auj a defnyddio eich enw defnyddiwr Aber, yn hytrach na f’enw i!

Cysylltu â’r VPN o macOS

Mae tudalen perthnasol Cwestiynau Cyffredin y GG yma.

Yn gyntaf, lawrlwythwch a rhedeg gosodwr asiant GlobalProtect. Derbyniwch y gwerthoedd rhagosodedig ar gyfer pob anogwr. Dylai glôb llwyd ymddangos ar ochr dde’r bar dewislenni. Cliciwch arno i agor y ffenestr “Welcome to GlobalProtect” a nodi “pa-vpn.aber.ac.uk” fel cyfeiriad y porth. Cliciwch ar “Connect”. Dylai ofyn wedyn am eich enw defnyddiwr a’ch cyfrinair. Rhowch eich enw defnyddiwr Aber (heb yr @aber.ac.uk) a’ch cyfrinair a chlicio ar “Sign In”. Dylai ofyn am eich cod OTP nesaf. Rhowch y cod a chlicio ar “Sign In”. Dylech gael eich cysylltu â’r VPN.

Cysylltu â’r gwasanaeth addysgu o bell

Gwasanaethau SSH

Mae’r Gwasanaethau Gwybodaeth yn darparu mynediad ssh at central.aber.ac.uk. Defnyddiwch eich hoff gleient ssh i gysylltu, ac ni ddylai fod angen rhedeg y VPN i wneud hynny.

Yn Windows, rydym yn argymell y cleient SSH, Putty. Yn Linux neu macOS, byddech, fel rheol yn defnyddio’r cleient llinell orchymyn “ssh” diofyn.

Mynediad trwy’r porwr at fyrddau gwaith a gweinyddion SSH

Mae’r GG yn darparu mynediad o bell heb gleient at eu bwrdd gwaith trwy wefan. Ewch i https://rd.aber.ac.uk/. Yno, byddwch yn gweld tudalen ar gyfer mewngofnodi. Mewngofnodwch gan ddefnyddio eich enw defnyddiwr Aber (heb @aber.ac.uk) a’ch cyfrinair.

Byddwch yn gweld rhestr o gysylltiadau.

central yw gwasanaeth SSH central.aber.ac.uk SSH.
Public Service yw bwrdd gwaith Windows y GG.

Cliciwch ar y naill neu’r llall a dylech fod wedi’ch mewngofnodi, a bydd y bwrdd gwaith priodol yn ymddangos trwy eich porwr gwe.

Nid yw’n amlwg yn rhyngwyneb y defnyddiwr, ond os gwnewch chi daro Ctrl-Alt-Shift yn ffenestr y porwr, bydd bar ochr yn agor yn cynnig dewisiadau ar gyfer creu bysellfwrdd sgrîn a ffurfweddu’r modd y mai eich llygoden yn ymddwyn. Bydd yn ddefnyddiol os bydd angen anfon cyfuniadau o’r bysellfwrdd sy’n gwrthdaro â mapio bysellfwrdd eich peiriant chi (e.e. Ctrl-Alt-Del).

Bwrdd Gwaith y Gyfadran Busnes a’r Gwyddorau Ffisegol

Rydym wedi gosod ein copi ni o’r gwasanaeth mynediad trwy borwr, er mwyn cysylltu â’n byrddau gwaith addysgu ninnau. Mae ar gael drwy https://remote-desktops.dcs.aber.ac.uk ac yn gweithio yn yr un ffordd â fersiwn y GG. Rhaid bod gennych gysylltiad VPN ar gyfer defnyddio’r gwasanaeth hwn.

Mae’n bosib y bydd y GG yn ychwanegu cysylltedd â’n byrddau gwaith addysgu trwy eu gwasanaeth nhw. Rydym yn aros am eu mewnbwn.

Cleientiaid Cynhenid

Gan fod amrywiaeth eang o feddalwedd cleientiaid, ni fyddwn yn darparu dogfennaeth fanwl ar gyfer hyn, ond gallwch gysylltu’n uniongyrchol â’r gwasanaeth trwy ddefnyddio offer mynediad o bell safonol.

Ar Windows, gallwch ddefnyddio cleient safonol y gwasanaethau terfynell ar gyfer cysylltu â’n bwrdd gwaith Windows, ac unrhyw gleient VNC (e.e. TightVNC) i gysylltu â Linux a macOS.

Ar Linux, mae gan Remmina ategion ar gyfer darparu mynediad at Windows RDP a Linux/macOS VNC.

Mae gan macOS gleient VNC integredig (Finder -> Go -> Connect to Server) ac mae gan App Store gleient Windows Remote Desktop am ddim.

Bwrdd gwaith Windows

Ar gael trwy RDP (Gwasanaethau Terfynell Microsoft) fel windows-desktop.dcs.aber.ac.uk. Bydd yn rhaid ichi dderbyn rhybudd am dystysgrif SSL y tro cyntaf byddwch yn cysylltu.

Byrddau gwaith Linux a macOS

Mae’r rhain ar gael trwy VNC fel linux-desktop.dcs.aber.ac.uk:0 a mac-desktop.dcs.aber.ac.uk:0. Yn amodol ar yr hyn mae eich meddalwedd cleientiaid yn gallu ei wneud, fe allech gael cysylltiad heb ei amgryptio ac fe welwch ffenestr naid yn rhybuddio amdano. Os ydych yn defnyddio’r VPN, bydd y traffig yn cael ei amgryptio am ran helaeth y daith, er bydd cyfnod byr wrth nesáu at y diwedd yn rhwydwaith Aber pan na fydd wedi ei amgryptio.

Cysylltu â’r storfa ffeiliau ganolog

Mae’r Gwasanaethau Gwybodaeth yn darparu storfa ffeiliau bersonol, sef M: ar y peiriannau bwrdd gwaith. Rydym ni yn darparu ardal fwy, sef P: ar ein peiriannau Windows. Mae’r ddwy storfa ffeiliau yn darparu copïau wrth gefn, felly os ydych yn storio eich data ar un o’r rhain, dylai fod yn bosib i’w adfer os bydd y gwaethaf yn digwydd. Mae’r Gwasanaethau Gwybodaeth yn creu copïau wrth gefn yn rheolaidd. Rydym ni yn creu copïau wrth gefn ar gyfer P: ddwywaith y dydd.

Bydd P: ac M: yn cysylltu’n awtomatig wrth ichi fewngofnodi i fyrddau gwaith Windows a Linux y Gyfadran.

Gyda Windows, mae sawl lleoliad rhagosodedig (e.e. Dogfennau, Lluniau, Lawrlwythiadau) yn cael eu hailgyfeirio i’ch gyriant P: a bydd llawer o’ch ffolder cartref ar yriant C: yn cael ei gydamseru i P: wrth ichi allgofnodi.

Ar Linux, mae P: yn ymddangos fel /impacs/{eich enw defnyddiwr} ac wedi’i fapio fel eich ffolder cartref. Felly bydd bron pob dim rydych yn ei wneud ar Linux yn cael ei gadw’n ddiogel ar storfa ffeiliau’r rhwydwaith. Mae M: yn ymddangos fel /aber/{eich enw defnyddiwr} er mwyn ichi allu cael mynediad at gynnwys y GG trwy’r lleoliad hwnnw.

Ar macOS, oherwydd problemau perfformio, nid ydym yn cysylltu storfa ffeiliau unrhyw rwydwaith yn awtomatig. Os bydd angen agor eich storfa ffeiliau GG neu storfa ffeiliau’r Gyfadran o Mac yn B57, dilynwch y cyfarwyddiadau isod er mwyn cysylltu.

Gall fod yn gyfleus i gysylltu â’r storfa ffeiliau hon o’ch cartref. Os byddwch yn ceisio cael mynediad oddi ar y campws, bydd angen sefydlu cysylltiad VPN yn gyntaf ar gyfer bron pob un o’r opsiynau isod.

Cysylltu â’ch storfa ffeiliau o Windows

Agorwch y rheolwr ffeiliau a chlicio ar “This PC”
Yn y bar dewislenni, dewiswch “Computer”, yna “Map network drive”
Dewiswch enw ar gyfer y gyriant o’r naidlen. Rydym ni yn tueddu i ddefnyddio M: ar gyfer eich storfa ffeiliau GG, a P: ar gyfer eich storfa ffeiliau yn y Gyfadran.
Ar gyfer storfa ffeiliau’r GG, rhowch \\smb1.aber.ac.uk\eich-enw-defnyddiwr (e.e. \\smb1.aber.ac.uk\auj)
Ar gyfer storfa ffeiliau’r Gyfadran, rhowch \\homefs.imaps.aber.ac.uk\eich-enw-defnyddiwr (e.e. \\homefs.imaps.aber.ac.uk\auj)
Cliciwch ar “Finish”
Bydd ffenestr “Enter network credentials” yn ymddangos.
Ar gyfer storfa ffeiliau’r GG, rhowch eich enw defnyddiwr fel PAU\eich-enw-defnyddiwr (e.e. PAU\auj)
Ar gyfer storfa ffeiliau’r Gyfadran, rhowch eich enw defnyddiwr fel IMAPS\eich-enw-defnyddiwr (e.e. IMAPS\auj)
Rhowch eich cyfrinair Aber arferol. Gallech hefyd glicio ar “Remember my credentials” fel nad oes angen nodi eich cyfrinair bob tro y byddwch yn cysylltu.
Cliciwch ar OK ac mi ddylai’r gyriant gysylltu.

Cysylltu â’ch storfa ffeiliau o Linux

Mae cysylltu â storfa ffeiliau’r rhwydwaith ar Linux yn broblem. Nid o ran a ellir ei wneud, ond o ran disgrifio sut i wneud. Yn y rhyngwyneb defnyddiwr graffigol (GUI), bydd y dull yn dibynnu ar y system ddosbarthu, y bwrdd gwaith a’r rheolwr ffeiliau yr ydych yn eu defnyddio ac, i raddau, ar y fersiynau hefyd.

Yn bersonol, byddwn yn argymell defnyddio’r dull sshfs lle bo hynny’n bosibl. Mae llai o broblemau wrth ddefnyddio’r dull hwn ac ni fydd angen cysylltiad VPN sy’n gweithio arnoch, ychwaith.

Cysylltu trwy sshfs

Mae sshfs ar gael yn storfeydd safonol y rhan fwyaf o systemau dosbarthu. Bydd yn rhaid ichi ei osod cyn y gallwch ddefnyddio’r dull hwn.

Mae sshfs yn defnyddio’r protocol sftp (sy’n rhan o ssh) er mwyn mowntio storfa ffeiliau o weinydd o bell. Gan ei fod yn dibynnu ar ssh yn unig, gallwch ei ddefnyddio heb droi at y VPN.

Gallwch ddefnyddio sshfs (i shellsrv.dcs.aber.ac.uk) er mwyn cysylltu ag unrhyw storfa ffeiliau sydd wedi’i mowntio ar y peiriant ac mae hynny’n cynnwys yr ardal bersonol sy’n cael ei darparu gan y GG (gyriant M:) a’r Gyfadran (gyriant P: ).

Chi biau’r dewis ar gyfer lleoliad mowntio’r storfa ffeiliau. Er mwyn rhoi enghraifft, byddaf yn rhagdybio eich bod wedi creu ffolder o’r enw “aber” gyda ffolderi o’r enw “IS” a “FBaPS” ynddo.

Dyma strwythur y cyfeiriadur sydd gennyf innau gartref:

$ pwd
/home/auj/aber
$ ls
FBaPS   IS

Mowntio’r storfeydd ffeiliau - efallai nad oes gennych storfa ffeiliau “dcs” - mowntiwch y rhai fydd eu hangen arnoch yn unig. Sylwch hefyd ar y slaesau llusg ar y llwybrau. Rhaid defnyddio’r rhain ar gyfer /aber/auj/, ac ni ddaw unrhyw ddrwg o’u defnyddio ar gyfer y lleill:

$ sshfs auj@shellsrv.dcs.aber.ac.uk:/aber/auj/ IS
$ sshfs auj@shellsrv.dcs.aber.ac.uk:/impacs/auj/ FBaPS

Dyma brawf ei fod yn gweithio - gallaf weld fy storfa ffeiliau GG (eithaf bach):

$ ls -l IS
total 456
drwxr-xr-x 1 6001 6001   4096 Nov  6  2018 cgi-bin
drwxr-xr-x 1 6001 6001   4096 Jun 12  2019 public_html
-rw------- 1 6001 6001 456448 Mar 24 09:11 redirect.log

I ddadfowntio’r storfa ffeiliau, dylech ddefnyddio’r gorchymyn “fusermount”:

$ fusermount -u IS
$ fusermount -u FBaPS

Cysylltu trwy fownt “cifs”

Dyma fyddai fy ail argymhelliad. Mae ychydig yn fwy hyblyg oherwydd gallwch ei ddefnyddio i gysylltu ag unrhyw ran o’r rhwydwaith y mae gennych fynediad iddi yn Aber.

Ond, mae ychydig yn fwy cymhleth oherwydd… * … rhaid bod gennych VPN sy’n gweithio cyn y gallwch ddefnyddio’r dull hwn. Gweler uchod. * … rhaid eich bod chi’n gwybod y manylion cysylltu ar gyfer pob rhan, ac mae’r rhain yn gallu amrywio’n eithaf eang ar draws y rhannau. Bydd rhoi’r manylion anghywir yn arwain at negeseuon gwall fydd yn anodd i’w dehongli. * … ni fydd gorchmynion ‘'’chmod’’’ yn gwneud yr hyn y byddwch yn disgwyl ohonynt.

Mae CIFS ar gael yn storfeydd safonol y rhan fwyaf o systemau dosbarthu. Bydd yn rhaid ei osod cyn y gallwch ddefnyddio’r dull hwn.

Fel gyda sshfs, rwy’n rhagdybio eich bod wedi creu cyfeiriadur o’r enw “aber”, ac y byddwch yn creu is-gyfeiriadau ar gyfer eich gwahanol fowntiau, ac wedi newid y cyfeiriadur i “aber”.

Storfa Ganolog y GG (M:)

$ mkdir IS # if it doesn't already exist
$ sudo mount -t cifs -o username=auj,domain=PAU,uid=$USER //smb1.aber.ac.uk/auj IS

Storfa bersonol y Gyfadran Busnes a’r Gwyddorau Ffisegol (P:)

$ mkdir FBaPS # if it doesn't already exist
$ sudo mount -t cifs -o username=auj,domain=IMAPS,uid=$USER //homefs.imaps.aber.ac.uk/auj FBaPS

Datgysylltu

Er mwyn datgysylltu o ran, dylech ddefnyddio e.e.:

$ sudo umount FBaPS

Trwy Ryngwyneb Defnyddiwr Graffigol (GUI)

Rhaid ichi ddod o hyd i’r ddeialog, yn eich meddalwedd rheoli ffeiliau, sy’n caniatáu ichi gysylltu â storfa ffeiliau rhwydwaith Windows (neu SMB neu Samba). Yn amodol ar eich meddalwedd, mae’n bosib y gofynnir ichi nodi’r manylion cysylltu mewn gwahanol ffyrdd. Fel uchod, byddaf yn defnyddio “auj” fel yr enw defnyddiwr ar gyfer yr enghreifftiau hyn. Newidiwch fel sy’n briodol!

Storfa bersonol y GG (M:)

Enw’r gweinydd: smb1.aber.ac.uk
Enw’r rhan: auj
Enw Defnyddiwr: auj
Parth: PAU
Llinyn cysylltu yn null Windows: \\smb1.aber.ac.uk\auj
Llinyn cysylltu yn null Unix: //smb1.aber.ac.uk/auj
Llinyn cysylltu yn null URL: smb://PAU;auj@smb1.aber.ac.uk/auj

Storfa Bersonol y Gyfadran Busnes a’r Gwyddorau Ffisegol (P:)

Enw’r gweinydd: homefs.imaps.aber.ac.uk
Enw’r rhan: auj
Enw Defnyddiwr: auj
Parth: IMAPS
Llinyn cysylltu yn null Windows: \\homefs.imaps.aber.ac.uk\auj
Llinyn cysylltu yn null Unix: //homefs.imaps.aber.ac.uk/auj
Llinyn cysylltu yn null URL: smb://IMAPS;auj@homefs.imaps.aber.ac.uk/auj

Cysylltu â’ch storfa ffeiliau o Mac OS

Agorwch Finder a dewiswch yr eitem “Connect to Server” yn y ddewislen “Go”.

Yn y ffenestr “Connect to Server”, rhowch yr enw priodol ar gyfer rhannu (manylion) yn yr adran nesaf) a chliciwch ar “Connect”.

A bwrw bod popeth yn iawn, dylech dderbyn cyfarwyddyd i glicio ar “Connect” er mwyn parhau, ac wedyn bydd naidlen yn ymddangos yn gofyn am eich enw defnyddiwr a’ch cyfrinair (ac yn cynnig ichi eu cadw yn eich cylch allweddi). Rhowch yr enw defnyddiwr a’r cyfrinair priodol (unwaith eto, mae’r manylion yn yr adran nesaf) a chliciwch ar “Connect”. Dylai’r gyriant ymddangos yn adran “Locations” eich ffenestri Finder.

Enwau rhannu ar gyfer storfeydd ffeiliau o dan MacOS

Rhowch eich enw defnyddiwr yn lle auj yn y mynediadau isod.

Storfa ffeiliau bersonol y GG (M:)

URL y Rhan: cifs://smb1.aber.ac.uk/auj
Enw defnyddiwr: PAU\auj

Storfa ffeiliau bersonol y Gyfadran Busnes a’r Gwyddorau Ffisegol (P:)

URL y Rhan: cifs://homefs.imaps.aber.ac.uk/auj
Enw defnyddiwr: IMAPS\auj